Novas

Artesanía de Galicia participa no Pull&Bear Pantín Classic Galicia Pro, que se celebra ata o 3 de setembro

1-9-2017

A Consellería de Economía, Emprego e Industria conta cun ‘stand’ de Artesanía de Galicia no epicentro do surf mundial. Un total de 33 obradoiros achegan aos visitantes os produtos dunha artesanía galega innovadora, actual e colaborativa.

A Consellería de Economía, Emprego e Industria, a través da Fundación Centro Galego da Artesanía e do Deseño, organiza un pop up de Artesanía de Galicia con motivo do Pull&Bear Pantín Classic Galicia Pro, na praia de Pantín (Valdoviño), que será o epicentro do mundo do surf en España ata o 3 de setembro.

Nos 4.000 metros cadrados que ocupa a montaxe desta edición hai oco para tendas, food trucks, rampla de skate, concertos e coloquios sobre medicamento deportivo. Entre a oferta comercial, Artesanía de Galicia está a amosar o traballo de 33 obradoiros artesanais, co fin de achegar ao público visitante os produtos dunha artesanía galega innovadora, actual e colaborativa.

Neste espazo, no que tamén se desenvolven demostracións en vivo do oficio das rederas a cargo da asociación Illa da Estrela, hai pezas de obradoiros como Marina Seoane (Oleiros), Milbrumas (Lugo), APAMP (Vigo), Traxandaina (Lugo), Asociación de Redeiras Illa da Estrela (Corme), Ferraxe de Prata (Lestedo, Boqueixón), Armaior (Quiroga), Alfarería O Rulo (Buño, Malpica de Bergantiños), Cerámica Unzueta (Brión), O Falsete (Buño, Malpica de Bergantiños), Pepa Lombao (Bonxe, Outeiro de Rei), Taller de Fer (Santiago de Compostela), Alfarería Lista (Buño, Malpica de Bergantiños), Manuel Figueiras (Muros), Concha Canoura (Culleredo), Ferreira Cerámica (Teis, Vigo), Atalanta Madera (Berres, A Estrada), María Feijóo (Santiago de Compostela), Antonio Suárez (Vigo), Pino Encuadernaciones (Vigo), Artesanía Ferradáns (A Estrada), Víctor Ares (A Coruña), Coiraxe (Vigo), Jorge Bellón (San Andrés de Teixido, Cedeira), Jatafarta (Santiago de Compostela), Nacho Porto (Carnota), Carlos San Claudio (Vigo), MAF (Riotorto), Castelo do Sobroso (Mondariz), Rectoral de Gundivós (Sober), Medialúa (Santiago de Compostela), Artefíos (A Coruña) e Degerónimo (Santiago de Compostela).

Este ano, cumpriranse tres décadas do comezo dun campionato que xa se converteu nunha referencia a nivel mundial. Os números da pasada edición amosan a relevancia adquirida polo evento, declarado Festa de Interese Turístico de Galicia, con máis de 55.000 persoas que pasaron polas súas instalacións durante os seis días que durou a competición internacional e 132.871 que se engancharon á proba a través da retransmisión en directo por Internet.