#RESONANCIAS22 FORO PROFESIONAL DE INSTRUMENTOS MUSICAIS
Patrocinado por Artesanía de Galicia, Música no Claustro convoca a segunda edición deste foro profesional de instrumentos musicais, o xoves 4 de agosto na Catedral de Tui. Dende unha perspectiva patrimonial e intersectorial, RESONANCIAS 22 dá continuidade a temas tratados na anterior edición, como a investigación, restauración e conservación preventiva dos instrumentos musicais históricos, xunto ao desenvolvemento e innovación de novas técnicas e materiais de construción.
En paralelo, RESONANCIAS 22 formula novos temas de debate e reflexión que nacen das oportunidades na simbiose do tecido profesional musical e artesán, da igualdade de xénero nos obradoiros de construción de instrumentos musicais ou a certificación e regularización da formación e profesionalización dos oficios artesanais. Un programa comisariado polo músico e investigador Samuel Diz.
PARA QUEN
Destinado a perfís vencellados aos oficios artesanais e construción de instrumentos musicais. Artistas, intérpretes musicais e profesionais da xestión cultural e da conservación en coleccións e institucións museísticas. Industria musical e outras empresas transversais. Estudantes e profesorado de ámbito académico en áreas de musicoloxía, etnomusicoloxía, historia da arte ou xestión do patrimonio cultural, así como disciplinas técnicas de enxeñaría.
Prezo xeral: 30€ / Prezo reducido para obradoiros inscrito RXAG: 15€ *
Número máximo de inscricións: 50 persoas
OS OBXECTIVOS DO FORO
Intercambiar coñecementos profesionais e crear sinerxías nun tecido artesán disperso promovendo un lugar de encontro profesional en Galicia.
Motivar o movemento asociativo profesional e o intercambio de necesidades e demandas entre o tecido artesán e o sector musical.
Impulsar a I+D+i intersectorial na construción, restauración e conservación preventiva dos instrumentos musicais.
Tratar os instrumentos musicais e os oficios coma elementos de identidade cultural e patrimonial, a igualdade de xénero nos obradoiros artesanais e a oportunidade de mercado, acorde aos obxectivos da Axenda 2030.
PROGRAMA
9h15 Entrega de acreditacións
9h30 Café de benvida e dinámicas de presentacións profesionais
10h Conferencia e encontro con Jonathan Santa Maria Bouquet, conservador do Museo de Instrumentos Musicais Santa Cecilia da Universidade de Edimburgo, e doutor en Filosofia da Música coa tese Reconstructing a lute by Sixtus Rauwolf.
11h Presentación de Labra - Asociación Profesional Galega de Construción de Instrumentos Musicais: Francisco Luengo (presidente) e Pablo S. Otero (tesoureiro).
11h30 Mesa redonda intersectorial sobre o emprego de madeiras galegas na construción de instrumentos musicais.
Montserrat Rodríguez Ogea, directora de innovación da Axencia Galega da Industria Forestal - XERA
Francisco Pedras Saavedra, técnico titular do Centro de Innovación e Servizos Tecnolóxicos da Madeira de Galicia - CIS
José Catoira, artesán
12h30 PAUSA CAFÉ
13h Conferencia e encontro con Antonio Suárez Martín, director do Centro Albayzín: Escola de formación profesional do Servicio Andaluz de Empleo e Centro de Referencia Nacional de Artesanía.
14h XANTAR
16h30 Conferencia e encontro con Elena Vázquez, conselleira técnica da Subdirección Xeral de Xestión e Coordinación dos Bens Culturais do Ministerio de Cultura e Deporte.
17h30 Sería posible contruír unha musette en Galicia? Encontro con Nadia Vázquez Martínez, intérprete e investigadora musical pola LUCA School of Arts - Campus Lemmens (Bélxica).
18h Estudo e restauración do óboe barroco Stanesby I da Catedral de Tui: Oli Xiráldez, artesán e David Garrido, oboísta.
18h30 Mesa redonda: a presenza de mulleres nos obradoiros de instrumentos musicais
Ana Fariña, artesá
Julia Marín Ramírez, artesá
Saínza Seivane, artesá
19h30 DESCANSO, PASEO, CEA ...
21h30 Concerto A musette no século XVIII de Nadia Vázquez Martínez, en conmemoración dos 300 anos do retablo da Expectación da Catedral de Tui.