O conselleiro de Emprego, Comercio e Emigración visitou hoxe en Nogueira de Ramuín as instalacións de Barreiros Artesanía, inscrito no Rexistro de Artesanía de Galicia. José González puxo o obradoiro situado na Ribeira Sacra como exemplo de innovación e de remuda xeracional no marco deste sector tan importante para a nosa terra, ao ter avogado o fillo do matrimonio fundador por un novo concepto empresarial. Así, destacou que o que hai case medio século se creou como taller de decoración de porcelana hoxe sexa un obradoiro de cerámica que aglutina o proceso completo de elaboración das pezas, combinando a tradición cun deseño actual e moderno .

A Fundación Artesanía de Galicia patrocina catro obradoiros impartidos por profesionais de Artesanía de Galicia, que se celebrarán ata final de ano en colaboración coa marca de roupa artesanal Carmen 17. Hoxe teñen lugar as primeiras actividades, impartidas pola artesá Io Morales, do taller Io Obradoiro téxtil, e que consistirán nun obradoiro de Remendo Creativo en horario de mañá e nun dedicado á técnica do Sashiko, pola tarde. Nos vindeiros meses, celebraranse tamén cursos de bordado impartidos por Minia Banet, de Variopinto; de estampaxe manual sobre téxtil, dos que se encargará Xiana Cobo; e de pasamanería, impartidos por Zeltia ao aire.

A xerente da Fundación Artesanía de Galicia, Elena Fabeiro, participou esta mañá na inauguración do XXIV Encontro Internacional de Torneiros da Madeira, que se celebra nesta localidade luguesa ata o domingo. O Goberno galego colabora desde a primeira edición na organización deste encontro monográfico dedicado á madeira torneada, que constitúe unha cita de referencia deste oficio en Europa. Inclúe demostracións de profesionais de prestixio internacional como a británica Helen Bailey, a francesa Géronime, o torneiro Pedro Clavero, de Andorra, e o galego Lolo Castro, gañador do Premio Traxectoria nos Premios Artesanía de Galicia 2018.

A directora xeral de Formación e Cualificación para o Emprego e a xerente da Fundación Artesanía de Galicia participaron na inauguración da primeira edición desta mostra efémera de interiorismo que acolle Santiago ata o 9 de outubro. Esta iniciativa inclúe a celebración de coloquios relacionados co ámbito laboral e o emprendemento e amosará o traballo de 55 profesionais da marca Artesanía de Galicia especializados en distintos ámbitos, entre outras actividades.

A Fundación Artesanía de Galicia abre as inscricións para os cursos de forxa, ourivería, olería de Buño, sombreirería e xastrería, este último en dúas quendas, que se van desenvolver en diferentes localidades galegas a partir do mes de outubro. Esta iniciativa enmárcase no programa Aprender da tradición. Oficios e técnicas, iniciado hai un ano e destinado á mellora continua dos profesionais da artesanía e á captación de novos talentos para o sector.