Novas
A Xunta presenta en Fitur a nova edición do seu proxecto pioneiro ‘Artesanía no Prato’ que promove as sinerxías entre gastronomía e artesanía
O director xeral de Comercio e Consumo, Gabriel Alén, presentou no stand de Galicia a reedición do libro “Artesanía no Prato” no que se inclúe unha versión en inglés e se incrementa o número de restaurantes e de obradoiros de Artesanía de Galicia. Alén destacou que se trata dun proxecto pioneiro que impulsa as sinerxías entre a artesanía e a gastronomía de xeito que se enxalcen mutuamente, mellorando a experiencia sensorial para o consumidor e engadindo singularidade e exclusividade. A artesá Cristina Velasco Mora, de obradoiro Anaquiños de papel (A Coruña), participa este ano no stand de Galicia en Fitur coa creación dun set fotográfico de vexetación galega e con demostracións do seu oficio no mesmo horario do evento.
A Xunta destaca o proxecto Amodo como exemplo de novas fórmulas de comercialización do produto artesán galego
O director xeral de Comercio e Consumo, Gabriel Alén, e a xerente da Fundación Artesanía de Galicia, Elena Fabeiro, visitaron hoxe en Ourense a tenda Amodo, na que se poden mercar produtos de oito obradoiros inscritos en Artesanía de Galicia. Gabriel Alén e Elena Fabeiro visitaron tamén o taller do sombreireiro Félix de Martín, un artesán de referencia que está a impartir o Curso completo de sombreirería no marco do programa formativo “Aprender da tradición. Oficios e técnicas” .
A Xunta analiza coa Federación Galega de Redeiras Artesás O Peirao vías de colaboración a prol da súa formación e cualificación profesional
O conselleiro de Emprego, Comercio e Emigración, José González, reuniuse hoxe con representantes da Federación Galega de Redeiras Artesás O Peirao, encabezadas pola súa presidenta, María Jesús González, para analizar posibles vías de colaboración a prol da súa formación e cualificación profesional e para coñecer os proxectos que a federación ten previsto desenvolver este ano. Na xuntanza tamén se abordaron aspectos relativos á prevención de riscos laborais no sector e púxose de relevo o apoio do Goberno galego a este colectivo.
A Xunta impulsa en Madrid a divulgación da técnica tradicional da pasamanería aplicada á moda
A Fundación Artesanía de Galicia patrocinou un ciclo de catro obradoiros impartidos por profesionais de Artesanía de Galicia especializados en artesanía téxtil, en colaboración coa marca de roupa artesanal Carmen 17. A iniciativa —que tratou o bordado e a estampaxe sobre téxtil— pechouse en decembro con dous cursos de bordado ao aire impartidos pola artesá Zeltia ao Aire.
Dúas candidaturas galegas resultan finalistas nos Premios Nacionais de Artesanía 2024
O director xeral de Comercio e Consumo, Gabriel Alén, e a xerente da Fundación Artesanía de Galicia, Elena Fabeiro, acompañaron hoxe en Madrid ao torneiro Aitor Martínez (Tomiño) e ao ebanista Fran Millán, de Frouma Atlantic Wood (Ribeira). Martínez —recentemente galardoado co Premio Talento Joven do Círculo Fortuny— resultou finalista no Premio Produto pola súa colección “Códigos del alma”. Mentres, Millán —gañador do Premio Artesanía de Galicia 2023— foi finalista do Premio Emprendemento polo seu traballo de creación de mobles con madeira de batea recuperada. O Premio Nacional de Artesanía 2024 foi para o ceramista Miguel Torres (Córdoba).
